Bavarci su tako prekinuli niz od devet mečeva zaredom u kojima nisu slavili protiv velikog rivala.
Superklasik opravdao je očekivanja ljubitelja najvažnije sporedne stvari na svijetu. Viđen je otvoren meč, spuštenog garda sa pregršt šansi (čak 40 šuteva) ali i promašaja na obje strane, a na kraju zadovoljniji revanš u Minhenu čekaju izabranici Vensana Kompanija.
Njemački velikan je bio bolji u prvom, a španski u drugom dijelu igre.
Šampion Njemačke je silovito krenuo u meč, a u devetom minutu je bio jako blizu vođstva. Dajo Upamekano je imao zicer, ali je sa tri-četiri metra loše šutirao, a loptu je sa gol-linije izbacio Alvaro Kareras.
U 16. minutu konačno nešto od domaćina – Arda Guler je sjajno uposlio Kilijana Mbapea, ali Manuel Nojer se odlično postavio i spriječio siguran pogodak.
Dva minuta kasnije Vinisijus Žunior je šutirao sa ivice kaznenog prostora, ali brani Nojer.
U 28. minutu nova velika prilika za Bavarce. Mladi Tijago Pitač je praktično u noge predao loptu Seržu Gnabriju koji je bio sam, ali je Andrij Lunjin bio na visini zadatka.
Nekoliko desetina sekundi kasnije dobra tranzicija Reala, Federiko Valverde je spojio Mbapea sa golom, a Francuz je iskosa sa desne strani tražio dalji ugao, međutim ponovo je Nojer bio siguran.
Četiri minuta prije odlaska na obaveznu pauzu Bajern dolazi do prednosti. Bio je to mat u tri poteza. Sve je krenulo od lošeg pasa Vinisijusa, lopta je stigla do Kejna koji je dodao za Serža Gnabrija, a ovaj pasom kroz sredinu pronašao Luisa Dijasa koji nije pogriješio u situaciji jedan na jedan.
Praktično „iz svlačionice“ gosti iz Minhena udvostručili su prednost. Ponovo greška Reala, ovoga puta Karerasa koji je izgubio loptu na svojoj polovini, pratio ga je Luka Pavlović koji je asistirao za Majkla Olisea, koji je odložio loptu za Harija Kejna, a Englez je preciznim udarcem iz prve sa oko 18 metara matirao Lunjina. Za Kejna je ovo 11. pogodak u sezoni u LŠ, a 49. na 49. nastupu, računajući sva takmičenja.
Olise je praktično minut kasnije mogao da povisi na 3:0, ali je Lunjin dobro pokrio bliži ugao i odbio loptu u korner.
U 61. minutu Vinisijus je mogao i morao bolje – Upamekano je u želji da vrati loptu Nojeru, praktično proigrao Brazilca koji je imao sve vrijeme svijeta, a onda je pogodio samo spoljni dio mreže.
Nakon toga je Olise u svom stilu sa desne strane ušao u sredinu, ali šutirao je malo preko gola.
A onda je u samo dva minuta Mbape imao dvije kolosalne prilike. Kod prve je sjajno reagovao danas fenomenalni Nojer, a u drugoj situaciji francuski golgeter je zamalo bio nepecizan.
Ipak, u 74. minutu Mbape je konačno zatresao mrežu. Trent Aleksander-Arnold je odlično centrirao po zemlji sa desne strane, a „desetka“ Madriđana je iz neposredne blizine proslijedila loptu u gol. I to je branio Nojer, ali lopta je od prečke završila iza njegovih leđa. Mbape je tako potpisao 14. gol u sezoni i LŠ i ponovo „pobjegao“ Kejnu na plus tri.
Tek što je Bajern krenuo s centra, Kejn je umalo vratio dva gola viška svom timu.
Desetak minuta prije isteka regularnog dijela Vinisijus je još jednom šutirao, ali pravo u Nojera.
Do kraja utakmice i jedni i drugi su imali po jednu dobru situaciju – Musijala na jednoj i Mbape na drugoj strani, ali rezultat je ostao nepromijenjen.
U istom terminu Arsenal je pobijedio Sporting u Lisabonu minimalnim rezultatom.
Gol odluke postigao je rezervista Kai Haverc u prvom minutu sudijske nadoknade nakon majstorske asistencije Gabrijela Martinelija.
Nije bilo previše uzbuđenja na „Hose Alvaladeu“, činilo se da će mreže ostati netaknute, ali da tako ne bude pobrinuo se njemački napadač.
Arsenal je u 16. minutu pogodio okvir gola, preciznije Noni Madueke iz kornera, a nešto ranije Maksimilijano Arauho je na drugoj strani pogodio prečku, utisak je da je David Raja vrhovima prstiju odbio loptu dovoljno da ne završi u mreži.
Sredinom nastavka zatresla se mreža domaće ekipe, ali gol Martina Zubimendija poništen je zbog ofsajda u kom se našao Viktor Đokereš u začetku akcije.
U finišu utakmice, Geni Katamo je zaprijetio iz kontre, ali dobro je još jednom intervenisao Raja, a onda je na već opisani način tim Mikela Artete stigao do „brejka“.
REZULTATI
Utorak
Real Madrid – Bajern Minhen 1:2
Mbape 74 – Dijas 41, Kejn 46
Sporting – Arsenal 0:1
Haverc 90+1
Srijeda
Barselona – Atletiko Madrid (21.00h)
PSŽ – Liverpul (21.00h)
