Nevladina organizacija „Prijatelji životinja Podgorica“ i ovog mjeseca nastavlja humanitarnu akciju „Naše malo njima znači mnogo“ u nadi da će njihov apel za pomoć naići na razumijevanje humanih ljudi, ljubitelja životinja, kao i društveno odgovornih kolektiva, kako bi pomogli velikom broju napuštenih životinja, koje borave na javnim površinama bez hrane i veterinarske njege.
„Pozivamo sve one koji osjećaju empatiju prema napuštenim životinjama, da se priključe našoj humanitarnoj akciji, uz napomenu da i najmanji vid pomoći može jako puno značiti. Sva prikupljena sredstva biće upotrijebljena isključivo za hranu i liječenje onih životinja koje se nalaze na javnim površinama i koje su lišene bilo čije pomoći, a takvih na žalost ima jako puno“, navode iz NVO „Prijatelji životinja Podgorica“ i pozivaju zainteresovane da ih kontaktiraju putem društvenih mreža.
