Loren, mama četvoro djece i popularna kreatorka sadržaja, podijelila je na TikToku svoje iskustvo. U videu je ispričala kako su ona i suprug odlučili sinu Oskaru uvesti „detoks“ od ekrana, jer su primijetili zabrinjavajuće promjene u njegovom raspoloženju i ponašanju.
„Sada su prošle tri nedjelje otkako Oskar ne igra igrice, ne gleda televiziju i ne koristi YouTube. Prva nedjelja bila je najteža. Bio je čak i nervozniji nego inače, njegovo ponašanje se pogoršalo. Ali onda su se stvari preokrenule i vidjeli smo ogromnu, pozitivnu promjenu“, rekla je Loren.
Primijetila je kako je Oskar postao smireniji, strpljiviji i prisutniji. Više se igra s prijateljima, uživa u jednostavnim dječjim igrama, kupa se tokom dana i puno više čita. Osim toga, pokazao je i veći interes za pomaganje u kućnim poslovima. „Želi kuvati sa mnom, više sudjeluje u porodičnom životu, jednostavno je prisutniji i angažovaniji u svemu što radimo“, objasnila je Loren.
Istakla je da su primijetili još jednu zanimljivu stvar – više ne pokušavaju svaki vikend ispuniti raznim aktivnostima kako bi nadomjestili vrijeme pred ekranima. „Oskar uči uživati u svom domu, pronalazi zabavu bez ekrana i radost u svakodnevnim trenucima“, dodala je.
Nije prvi put da su mu ograničili ekrane
Loren je podijelila kako su i ranije pokušali smanjiti Oskarovo korišćenje ekrana jer su primijetili da oni na njega negativno utiču. „Nije imao strpljenja, posebno prema mlađoj sestri, a postao je i jako nervozan. Stalno je razmišljao o igricama, brzo je jeo samo da se što prije vrati igranju, a vikendom se budio misleći samo o igricama“, prisjetila se.
Ipak, priznaje da je ovaj put bio izazov i za njih kao roditelje. „Svaka faza donosi nove izazove, ali i nova saznanja. Zasad nam ovo djeluje kao dobra odluka.“
U komentarima su se javili brojni roditelji sa sličnim iskustvima.
Jedna mama napisala je: „Radim isto sa svojom osmogodišnjakinjom. Primijetila sam promjene kakve nikad nisam vidjela. Sve razgovore vodi oko igrica, prvo i zadnje što bi radila je uzela tablet. Nije mogla ni zaspati bez YouTubea u pozadini. Prva nedjelja bila je užasna. Stalno je imala ispade bijesa i molila me da joj pustim nešto.“
Drugi korisnik podijelio je iskustvo sa starijim bratom: „Radite pravu stvar. Moj brat sada ima 20 godina i agresija zbog igranja nikad nije nestala. Još uvijek viče dok igra videoigre, i to jako glasno.“
