Foto: FIFA World Cup/Twitter
Francuska je pobjedom krenula u odbranu trona na Svjetskom prvenstvu.
Aktuelni šampion i osvajač Mundijala u Rusiji večeras je u u Kataru nakon preokreta savladao Australiju (4:1) u prvom kolu grupe D na “Al Janub” stadionu u Al Vakrahu.
U jednoj odličnoj fudbalskoj predstavi, uprkos svim problemima sa povredama, bez zvanično najboljeg napadača svijeta Karima Benzeme “trikolori” su ostavili odličan utisak.
Meč je obilježio Olivije Žiru koji se sa dva gola stigao do 51. pogotka u nacionalnom dresu i tako izjednačio rekord slavnog Tijerija Anrija, inače do danas najboljeg strijelca reprezentacije.
Po gol i asistencija za Kilijana Mbapea i Adrijena Rabioa, dok je na drugoj strani pogodio Kreg Gudvin.
Razigrana, poletna Francuska pored četiri gola, mogla je i ubjedljivije da slavi.
Nije dobro počelo po Francuze, pošto su “kenguri” iz prve prave prilike na meču stigli u vođstvo, već u devetom minutu.
Sjajna dijagonala Harija Sutora, još bolji dribling u prijemu Metjua Lekija, koji je ušao u šesnaesterac, uposlio na drugoj strani usamljenog Gudvina, kome nije bilo teško da sa tri metra pronađe put do mreže.
Tom prilikom povrijedio se Lukas Ernandez, a zamijenio ga ja njegov rođeni brat Teo.
Umalo šok za Francuze u 22. minutu, greška Ernandesa i “projektil” Mičela Djuka, ali lopta odlazi tik pored lijeve stative gola koji čuva Ugo Ljoris.
Očekivala se reakcija “galskih pijetlova”, a to se i dogodilo.
Najprije je upravo Teo Ernandez odlično centrirao u 27. minutu, a često kritikovani Rabio nadvisio štopere protovničke ekipe i preciznim udarcem glavom matirao Metjua Rajana za izjednačenje.
Pet minuta kasnije preokret aktuelnih šampiona. Nakon greške Netanelija Etkinsona, Mbape efektno petom dodao do Rabioa, koji odlaže do usamljenog Žirua, a as Milana usamljen sa tri-četiri metra šalje loptu u mrežu.
Francuska je imala još nekoliko dobrih šansi u prvom dijelu, međutim šutevi Žirua, Usmana Dembelea i Antoana Grizmana završili su pored gola.
Najbolju priliku imao je Mbape na isteku 45 minuta, kada je poslije centaršuta Grizmana, prebacio cijeli gol iz zicer situacije.
“Kenguri” su minut kasnije umalo kaznili promašaj zvijezde Pari Sen Žermena, kada je Džekson Ajrvason dobro ispratio ubacivanje, uputio udarac glavom, Ljoris je već bio savladan, ali stativa je bila saveznik Francuza.
U nastavku potpuna dominacija Francuza.
U petom minutu drugog dijela Žiru je još jednom bio blizu pogotka, kada je atraktivno probao “makazicama”, ali nije bilo promjene rezultata.
Grizman je mogao do gola u 67. minutu, kada je čuvar mreže “sokerosa” već bio savladan, međutim sa gol linije intervenisao je Aziz Benić, ipak u nastavku akcije novi pogodak u mreži Australije.
Dembele je centrirao, Mbape nadskočio čuvare, šutirao glavom, a lopta se od stative odbila iza leđa nemoćnog Rajana.
Samo tri minuta kasnije, Mbape je protutnjao po lijevoj strani, pronašao Žirua, koji u svom stilu glavom trese mrežu za svoj drugi gol na utakmici, a ukupno 51. u dresu sa državnim grbom, kojim se (kako smo prethodno naveli) izjednačio sa rekorderom Anrijem i postavio konačan ishod.
Ranije danas u istoj grupi, Danska i Tunis odigrali su bez golova.
U drugom kolu Francuska se sastaje sa Danskom, dok će Australija prve bodove tražiti protiv Tunisa
